Dövlət Neft Şirkəti (SOCAR) 2024-cü ilin ilk 6 ayını (yanvar-iyun) 1 milyard 545 milyon manat xalis mənfəət ilə başa vurub.
KOB TV xəbər verir ki, şirkət 2023-cü ilin eyni dövrünü 1 milyard 414 milyon manat xalis mənfəət ilə bağlamışdı.
Beləliklə, SOCAR-ın yarımillik xalis mənfəəti 131 milyon manat və ya 9,3% artıb.
SOCAR-ın satışdan gəlirləri 2023-cü ilin ilk 6 ayında 42 milyard 181 milyon manat ikən, 2024-cü ilin ilk 6 ayında 45 milyard 54 milyon manat təşkil edib (2 milyard 873 milyon manat və ya 6,8% artıb).
30 İyun 2024-cü il tarixində SOCAR 72 milyard 581 milyon manat cəmi aktivlərə malik olub. Şirkət 2023-cü ilin sonunda 71 milyard 966 milyon manat cəmi aktivlərə malik idi.
Azərbaycan Respublikası Dövlət Neft Şirkəti (“SOCAR”) 13 sentyabr 1992-ci il tarixli Prezident Fərmanı ilə Azərbaycan Respublikasının qanunvericiliyinə əsasən təsis edilib. SOCAR hasilat, nəqletmə və emal əməliyyatları ilə məşğul olur. SOCAR-ın əsas fəaliyyəti neft, qaz və qaz kondensatlarının hasilatı, emalı, nəql edilməsi, eləcə də neftin, qazın, neft məhsullarının satışından ibarətdir. SOCAR 100 faiz Azərbaycan dövlətinə məxsusdur.
